Un suañu

UN SUAÑU


Tóo yera d'oru puru 
'n aquil palaciu 
de les Mil y una Nuiches. 
¡Yera perguapu! 

Non; el cielu nun yera, 
mas semeyaba, 
¡Qué bayura y qué brillu 
'n aquilla sala! 

El neñu, con'os güeyos 
arremiellaos, 
amiraba plasmau 
pa tóos los llaos. 

El guapu y altu techu 
con reblicoques; 
les llámpares, los cuadros 
y les alfomes. 

Llargues meses tallaes 
con gran finura 
y, enriba d'illes, fuentes 
con rica fruta. 

Mazanes colloraes, 
piescos y nisos, 
viruéganos, castañes, 
nueces y figos. 

Carápanos, ablanes, 
guindes, cereces, 
arándanos, peruyes, 
prunos, cirueles...
 
Tanta bayura había 
'n aquil llugar 
que'l neñu tinía dubia 
ond'empezar. 

Cuando quixo coyer 
una mazana 
dió un blincu y dispertó 
ena so cama.

Comentarios

Publicar un comentario

Entradas populares de este blog

Una retirá a tiempu

UNA RETIRÁ A TIEMPU Tarazau per un dolor  que lu tien clavau na cama  pega quexíos y clama,  igual qu'n llocu, Melchor.  Lo que a él lu fai bufar  más que'l dolor, aquel día,  que paga la Compañía  y nun pué dir a cobrar.  Y si va la so Sunción  escuende la paga entera  nel fondu la faltriquera  y él nun güel un perrón.  Buscaba la solución  al casu, pa resolvelu,  cuando allegose pa velu  un compañeru: Xuanón.  —Llegaste nun bon momentu;  —diz Melchor con allegría—  Toma esto de seguía.  —y apurriói el Ilibramientu—.  Vas dir a cobrar per mí  callando de la muyer  y dempués d'escurecer  traes les perres p'aquí.  Acetó el amigu al puntu  y al marchar quedó Melchor  munchu meyor del dolor  al salvar aquel asuntu.  Asomó Xuanón con tientu  cuando hubo nochecíu,  pálidu, descoloríu como sopa en sin pimientu. Estaba l'home nerviosu;  apoy...
Leer más

Los paxarinos

LOS PAXARINOS Arrefundiái los gomeros  y sei güenos, rapacinos;  dexai que llibres esnalen  p'el mundu los paxarinos.  ¿Decís que ye per arruelu?  Nun vengais con enguedeyos;  asentáivos 'n isi sucu  y arremellai bien los güeyos.  Mirai p'aquel xilguerín  cómo el picalín algama  d'aquilla argute guindal  blincando de rama en rama.  Picótia una roxa guinda,  cueye payes nel carreru,  paliquinos, yerba, folla...  y acárrialos pa'l so ñeru.  Ansina pásase'l díe  llasparderu, sin cansanciu,  y si apara ye pa dar  al eire so dolce canciu.  Lo mesmo fai la pioyina,  el ñerbatu, el raitanín,  la zarrica y el malvís,  la pega y el veranín.  Si allegramos los oyíos  ye la so xera del añu  ¿pa qué nun los protexeis  en vez de faceyos dañu...?  Arrefundiái los gomeros  y sei güenos, rapacinos;  dexai que llibres esnalen  p'el mundu los paxarinos...
Leer más

El carrerín

EL CARRERÍN Andia el carrerín  sin saber a ú va;  illi nun se apara  ni amira p'atrás.  Esguila a los montes,  abaxa a los valles,  estázase al río,  pero sigo alantre.  ¿A ú va el carrerín?  naide sabe ná;  ni a ú s'empobina  nin qué catará.  Iguen i los árbores  escolta d'honor  y peñeren'n illi  rayinos de sol.  Como el carrerín  yo tamién colé  sin saber a ú diba  ni en cata de qué.  Frayau d'andiar  per tóos los atayos  atopeme solu  al cabu los años.  Güey nun sé a qué vine  ni en cata de qué.  ¿U tá el carrerín  pa poer golver...?  Golver al llugar,  golver a la infancia,  al campu la ilesia  onde yo xugaba. Blincar a la muerte, xugar al pío campu, al saltu corríu al guá y liriu-lariu. Facer xiblatines, dir con utros neños a caza de grillos o en cata de ñeros. Pero toy muy llonxe, llonxe del ayer. ¿U tá el carrerín pa poer golv...
Leer más