Plaga moderna

PLAGA MODERNA

En caminos y caleyes, 

en les pistes nacionales 

y hasta en senderos de oveyes, 

hay más coches que lenteyes 

daben antes per mil riales. 

Ansí qu'en les carreteres 

pasen tóos tan esbocaos 

que igual homes que muyeres 

tienen que andar a carreres 

pa nun morrer estrapaos. 

Pero siempre ansí nun fué; 

antes, de quí hasta París, 

atopabes xente a pié, 

dalguna que otra xarré 

y algún carru del país.

 

Había tan pocu ruíu, 

tan tranquilo aquello yera, 

que andabes despreveníu 

xugando al saltu corríu 

p'el mediu la carretera. 

Pero nel siglu pasau 

un inxenieru francés, 

con lates y fierro usau, 

fexo un coche semeyau 

a una cafetera esprés.

El día que'l inxenieru 

anunció que lu probaba, 

axuntose un formigueru 

de públicu vocingleru 

que per velu andar naguaba. 

El inventor cholu a andar 

dando el rabil sin desmayos 

y el coche empezó a rinchar, 

a xingase y a saltar 

como si pisara escayos.

Tal fumarea escapaba 

del fondu de sos entrañes 

que toa la xente pensaba 

que dientro d'él fervotiaba 

una pota con castañes. 

Vió el públicu, satisfechu, 

que'l artefatu chó a andar 

y que diba muy derechu, 

anque al subir un repechu 

tuvieron que lu emburriar.

 

D'entoncies p'acá, el inventu, 

perfecionose tan bien 

que tó'l mundu tá contentu, 

los coches van en aumentu 

y toa la xente lu tien. 

¡Qué inventor más grande fué! 

¡Qué home tan estraordinariu! 

Anque nun sepan pa qué 

los que caminen a pié, 

el coche ye necesariu. 

Fai falta pa'l empleáu 

que'n les afueres trabaya; 

en el coche va volau 

y ansí llega descansau... 

pa poder folgar a esgaya. 

Pa'l que nel fin de semana 

lleva en alegre cuadrilla 

a fíos, muyer y hermana 

al monte, bien de mañana, 

a fartase de tortilla. 

Pa los homes muy rumbosos 

que siempre, al cayer la noche, 

van golfatiando golosos 

lo mesmo que los raposos, 

ye, tamién, útil el coche.

Val pa'l que nun tien chapleta, 

que corre com'un cañón, 

y como a naide respeta 

faí tirase a la cuneta 

al sufríu peatón. 

Pa'l que vino y gasolina 

mezcla per ser descudiáu, 

nun val, pos siempre termina 

estrellau contra una esquina 

y con el coche abollau. 

Claro que los abollones 

nun ye poblema importante; 

hay talleres a montones 

onde per cuatro perrones 

vuelven dexalos flamantes. 

Y otra vez a soltar mases 

d'espesu y negru fumazu 

y a semar 'l aire de gases 

que dexen calles y cases 

afumaes com'un cazu. 

Los de ruines faltriqueres, 

pos nin pa sal da la paga, 

vamos luchar como fieres 

pa dexar les carreteres 

llimpies d'esta sucia plaga. 

Mas si queremos llimpiales 

hay que luchar sin desmayos; 

¡tenemos que sulfatiales 

igual que los patatales 

que tienen escarabayos! 

Pero ye con condición: 

cuando nun quede ningún, 

cuando de'quí hasta Xixón 

nu haiga coche nin camión 

¡entoncies compro yo ún!