Negociu seguru

NEGOCIU SEGURU

Tilano el del Meruxal 

cansose de los trabayos, 

y desféxose de tóo: 

de les tierres, de los praos, 

de la casa, del molín, 

de les vaques y los xatos. 

Del produtu de la venta 

xuntó un bon puñau de cuartos 

y entamó dir pa Xixón 

y dedicase a los tratos.

 

¿Y en qué clase de negociu 

diba Tilano a emplegalos 

si siempre llía na prensa 

que estaba infestao de cacos 

que robaben xoyeríes, 

comercios, chigres y estancos 

quedando los probes dueños 

sin plumes y cacariando...? 

Tenía miéu per los dineros 

y primeru d'emplegalos 

fué a consultar con Rufón 

que daba conseyos sabios 

y tenía munchu mundu, 

pos cuntaba munchos años.

 

Isti oyolu pensatible 

y después de sopesalos 

diói, Rufón, unos conseyos 

muy prudentes y sensatos:

 

Si pones un comercín 

onde viendas garabatos, 

fesories, picos y pales, 

maces, foces y gadaños, 

ten, Tilano, per seguru 

que están a salvo los cuartos. 

Ye facer lo que te digo 

la forma d'aseguralos, 

pos está bien persabío 

que esa reciella de cacos 

afuyen de los preseos 

como del agua los gatos.