Los defensores del vino

LOS DEFENSORES DEL VINO

Local sin ventilaores, 

una cortina de fumu

y un grupu de bebeores, 

escelentes cataores, 

que faen muy bon consumu. 

En un escuru rincón, 

detrás d'un porru, está Mino 

con Cefero y con Xuanón, 

dando a voces su opinión 

sobre cuál ye meyor vino.

 

Discusiones muy frecuentes, 

pos tóos en aquel figón 

beben clases diferentes; 

per eso, con voz potente, 

da Cefero su opinión: 

—Amigos, hais de saber 

que ansí lo diga isi moro 

que i llamen Muza, a mió ver 

lo meyor que hay pa beber 

ye sin duda el vino toro. 

Ye lo que siempre prefieru, 

pos anque sea más negro 

que la boina d'un mineru 

desde'l campanu primeru 

ya siento yo que me alegro.

Toy con ello entusiasmau 

y según pienso y discurro 

daqué tien el condelgau 

cuando me pon animau 

pa trabayar com'un burro.

 

Diz Xuanón: —Estás mal 

y despistau, ¡qué caray! 

nun siendo tú, so animal, 

toa la xente piensa igual, 

que como el blanco nun hay.

Ye clarino y tresparente 

como raxa de xamón 

cuando la corta un pariente 

pa convidar complaciente 

a algún familiar gorrón. 

Na más beber un vasín 

quédame'l pulsu serenu 

y si cargo un pucuñín 

duérmome com'un tapín 

y hasta otru día nu hay nenu. 

—Callai —diz Mino enfadau— 

que'n la paz como en la guerra, 

en la mina y en el prau, 

en casa y en cualquier llau 

el meyor vino ye'l tierra.

 

Según decía mió güelu 

ye vino de soberanos, 

suave y finu com'un pelu, 

que s'esmuz per el gargüelu 

como l'anguila en les manos. 

D'ello enllenó la bodega 

nuestru Cristóbal Colón, 

pero a América nun llega, 

pos marchó como mantega 

la valiosa provisión. 

Fué cuando aquel bon vigía 

(el recordalo me aterra) 

al ver que de sé morría 

nun pensó nin en so tía, 

solo gritó: —¡Tierra! ¡Tierra! 

Ye'l de más puru sabor 

y nu hay otru que lu balte, 

más pa mí, bon bebeor, 

anque'l tierra ye'l meyor... 

¡que toro y blanco nun falte!