¿Lladrones a mi...?¡Ni hablar!

¿LLADRONES A MI...? ¡NI HABLAR! 

Llevaba Pin el de Antón 

mediu mundu recorríu; 

cumplió el serviciu en Xixón, 

tuvo en Teverga, en Turón 

y en Uviéo con un tíu. 

Envuelta nel so pelleyu 

tanta esperiencia tenía 

que hasta un paisanu vieyu 

diba a buscar so conseyu 

cuandu de viaxe salía. 

— ¡Cuidao con los lladrones! 

—solía decimos Pin—.

Sobre tóo a les poblaciones 

acuden comu ratones 

cuandu güelen el tocín. 

Si vos pega un tamburrión 

dalgunu que va con prisa 

¡seguru que ye un ladrón! 

y si vais sin precaución

¡adiós cartera y camisa! 

Sabiendo que ansina yera 

¿quién, demongrios, dixo miéo...? 

Punse ropa dominguera, 

saqué billete en tercera, 

y colé camín d'Uviéo. 

Di más güeltes qu'una noria 

p'atopar onde comer; 

tomé café con chicoria, 

después compré una fesoria 

y un mandil pa la muyer.

 

Ya diba pa la estación 

cuando un tipo mal portáu 

y con cara de ratón 

solmenóme un tamburrión 

que me dexó espaturráu.

Perdón —díxome, y marchó, 

pero según se alexaba 

palpo el bolsu y veo yo 

que me faltaba el reló 

y fui tres d'él que bufaba. 

Echéi la mano al gargüelu; 

díi un golpe na nariz 

que vió los astros del cielu 

y cuando taba nel suelu 

púnsei un pié na cerviz. 

Sobre la cera espurríu 

chillaba com'un rebecu; 

yo cataba el reló míu 

y fui a topailu escondíu 

en el bolsu del chalecu.

 

Dempués de llamai lladrón 

y dai una tunda güena, 

sacudime el pantalón 

y colé pa la estación 

contentu de la faena. 

En casa quedé plasmáu 

al decir la mió Vesita: 

— Tú siempre tan despistáu; 

¡dexeste'l reló olvidáu 

enriba de la mesita!