La xente tien muncha priesa
LA XENTE TIEN MUNCHA PRIESA
La vía ye muy guapina,
ye dulce com'una fresa,
pero tóos tenemos priesa
pa perdela muy aína.
Corremos pa la pocera
igual que los mesmos diaños
faciendo polvo los años
como'l molín la cebera.
Cuando el maestro na escuela,
per burros y per oveyes
mos retuerce les oreyes,
ya decimos: —¡Tiempu, vuela!
¡Corre hasta que sea chaval
y que quede tóo esto atrás;
yo nun quiero estudiar más,
pos lo negro faime mal!
Y el tiempu, com'una bala,
conviértemos en chavales
con barba... y en sin dos riales
pa poder dir a rapala.
Gritamos como bederres:
—¡Corre, tiempu, com'un rayu
y cátame algún trabayu
onde gane güenes perres!
Salta el tiempo com'un gatu
y estamos, con ilusión,
trabayando pa un patrón...
que nun lo da ni con xatu.
Pa detrás de nun pagar
siempre tá refunfuñando,
chando riñes y pinchando
hasta facenos rabiar.
Ricando dientes y mueles
al vemos ansí trataos,
golvemos esperanzaos
la vista hacia les quinieles.
Y venga a cubrir colunes,
apriesa, con les dos manes,
y venga a pasar semanes
quedando siempre en ayunes.
Si se dan mal les quinieles
la llotería ye igual,
puos nun mos toca ni un rial
y seguimos a dos veles.
El tiempu corre volau;
pasen díes, meses y años
y les perres nun hay diaños
de veles per dengún llau.
En nuestru andar allocaos
tropezamos nel camín
una muyer, un cielín
que mos dexa trastornaos.
-¡Nun pares, tiempu, de andar;
sigue, sigue galopiando,
perque ya toy deseando
de llevala hasta'l altar!
Como potros esbocaos
el tiempu fai pasar años
y como si fuera en suaños
conviértemos en casaos.
Quita d'un par de soplíos
fueyes a los calendarios
y ya semos millonarios,
pero no en perres... ¡en fíos!
Fartos de pasar en vela
les nuiches, llindiando nenos,
gritamos de rabia llenos:
-¡Corre apriesa, tiempu, vuela!
Y embargaos d'ilusión
vemos a los nuestros guajes
mayorinos y con trajes
de primera comunión.
Pero seguimos inquietos;
queremos velos mayores,
convertíos en siñores
y que mos den munchos nietos.
Como esto mos aprovez
y nun tenemos sufrencia,
acábase la pacencia
y gritamos otra vez:
—¡Qué'l tiempu nun se amodorre
y que corra sin cesar!
¡Nun pares de galopiar,
corre apriesa, corre, corre...!
Corre'l tiempu que se mata
y, sin que mos demos cuenta,
llegamos a los noventa
y claro... a espurrir la pata.
Cuando geránios y ortigues
mos tapen con manta espesa
ye cuando acaba la priesa,
las penes y les fatigues.
El decilo ye un atrasu,
pos anque esto sea ciertu
ye pedricar en desiertu,
perque ningunu fai casu.
Y tóo'l mundu se acelera
igual que oveyes novates
y pierden les alpargates
corriendo pa la pocera.
Comentarios
Publicar un comentario