Estampa aldeana
ESTAMPA ALDEANA
Llevanten los caricoses
un fumu espesu y tan pardu
que les persones y coses
vense turbaes, borroses
como ablanes en el sardu.
En la cocina aldeana,
fartos de xurniar ceniza,
un rapacín y so hermana
comen con muy poca gana
un cachu de llonganiza.
La madre, con una azuela,
desfai estielles d'un tochu
y sentá nuna tayuela
una vieyina, la güela,
pulga castañes pa'l gochu.
Fierve una pota de fierru
colgá nes calamiyeres
mientres fuera lladra un perru
a dalgún mozu gamberru
que quiso saltar a peres.
Mientres nel llar van quemando
los tizones de castañu,
un paisano está bociando
y pa'l samartín mirando
tumbau allá nel escañu.
Mira con güeyos dementes
los chorizos y el xamón,
de los gavitos pendientes,
y refunfuña ente dientes:
—¡Maldita sea la tensión!
Comentarios
Publicar un comentario