Colasón el sastre
COLASÓN EL SASTRE
Home meyor nun lu había,
agora que, como sastre,
Colasón yera un desastre;
toa la xente lo sabía.
Ansí ye que, con tal fama.
nu i quedaba al costureru
más que metese a mineru
o chase a morrer na cama.
El nun quería la mina
y embarcó cierta mañana
con cuenta facer l'habana
na República Arxentina.
Entavía tuvo bazu
de llevase, muy tranquilu,
dende la plancha hasta'l filu
'n un paquete baxo el brazu.
Colasón, naquella tierra,
solo sufrió desengaños
y regresó a los seis años
como fue: sin una perra.
Díxoi un: —¡Gúenu llegaste!
¿Nun te da rabia, Colás,
traer la plancha na más?
¡Menos de lo que llevaste!
—¡Ay, amigu, y menos mal
que'l mió pelleyu salvó!
El barcu a pique mos chó
un tremendu temporal.
Tuve diez hores nadando
hasta que subí a una lancha.
—¿Cómo salvaste la plancha?
—¡Recongrio! ¡Quedó flotando!
Comentarios
Publicar un comentario