Camín d'otros planetas
CAMÍN D'OTROS PLANETAS
Hay tantísimu follón,
tantu espolín y fregau,
que tras llarga reflesión
allegué a esta conclusión:
el mundu tá mal montau.
De toes les nuversidaes
van saliendo añu tres añu
cobeces destornillaes,
muy llistes, muy estudiáes,
pero nu atayen el dañu.
Yo, que nun sé debuxar
nin la o con un canutu,
cuasi toy por apostar
(y nun ye hablar per hablar)
que lu arreglo en un menutu.
Los rusos y americanos,
en sin plizca dolimientu,
derrochen con dambes manos
en cuetes y en aroplanos,
la comida del famientu.
Hoy cuasi tan convencíos
que'l gastu ye cosa vana;
los planetas espardíos
p'el espaciu, tan vacíos,
nu hay castra de raza homana.
Y aquí está la solución
pa esta prubitina tierra;
como hay mundos a montón
cada un será un polmón
pa isti nuestru, siempre en guerra,
De aquí, a diariu, saldrán
cuetes enllenos de xente
que alluegu se posarán
en un mundu onde serán
felices completamente.
Al de praos más mullíos
dirán tóos los folganzanes
y allí, nel suelu espurríos,
dormiendo y dando ronquíos,
trescurrirán les semanes.
Na más espurrir la mano
tendrán comida a barullu
y pa que tóo sea llano
ni en invierno ni en verano
sonará ningún turullu.
En un planeta espaciosu
y bien arrodiáu d'estantes
yo istalaría gozosu
isi grupu numerosu
que formen los comerciantes.
Nu habría impuestos per ná
nin fiscalía ninguna;
con completa llibertá
pa que suban de verdá
los precios hasta la lluna.
Un planeta que sea llanu
coyerémoslu d'estaya
y admirando per un planu
fadremos con diestra manu
campos de fubol a esgaya.
Allí dirán a parar
tóos los hinchas del balón;
tendrán micro pa glayar
y sopletes pa cortar
les valles de contención.
Los refles serán robós
y, pa evitar atropellos,
van a ser de fierru tóos,
pos si non, válgame Dios,
acaben pronto con ellos.
P'albergar a los lladrones,
de los que está bien repleta
la tierra en tóos los rincones,
pos son cientos de millones,
ye poco un solu planeta.
Coyeremos dos iguales
y allí vamos construyir
bancos de amplios ventanales
y con caxes de caudales
que sean fáciles d'abrir.
Si dalgún d'ellos nun tien
la pacencia pa esperar,
ye igual, pos tendrá tamién
dinamita a tutiplén
pa que les faiga volar.
N'el planeta más guapín
que tenga mejor terrenu,
fadremos un gran jardín
onde habrá flores sin fín
que despidan olor güenu.
Y parques per tóos los llaos
con miles de surtidores,
con animales variáos
y árboles qu'estén cuayaos
de paxarinos cantores.
Aquí, nesti paraísu,
soltaremos los gamberros
y pronto quedará llisu,
pos tendrán, si ye precisu,
navayes, palos y fierros.
Allí donde nu haiga gritos
y sople aire sin cesar
dirán tóos los drogaditos
pa que puéan los benditos
fumar porros sin parar.
Y si dalgún quier pinchase
pué venir a esti planeta,
pos tendrá en sin preocupase
abuyes de cualquier clase;
¡hasta de texer calceta!
Y ansina unes llargues llistes
con xente de mil maneres:
políticos, terroristes,
intermediarios, güelguistes,
chulos y cabareteres.
Ningún estaría mal
nin naide protestaría,
pos pensando tóos igual
tó'l mundu sería formal
y muy feliz viviría.
Ansí que muncha atención;
a meter en la maleta
el pijama o camisón.
que'n la primer ocasión
vamos pa cualquier planeta.
Perque ya va siendo hora
de que isti mundu reondu
quede llibre desde agora
per sécula seculora.
¡El probe ya aguantó abondu!
Comentarios
Publicar un comentario