Güelga en "Les Caldes"

GÜELGA EN "LES CALDES"

Esa güelga que Perón
y sos sedientos secuaces
implanten, sin razón,
paez xuegu de rapaces.

Lo que piden esos pocos,
según rumor que aquí llega,
demuestra que están más llocos
que aquel que asó la mantega.

Más vasos de cristal fino
diz que piden a la dueña
cuando ellos beben el vino
hasta per una madreña.

¿Qué querrán esos paisanos
más focos allí colgaos
si en tomando dos campanos
ya están ellos alumbraos?

¿Pa qué darán la tabarra
pidiendo meses y silles
si cualquier noche de farra
fáenles toes estilles?

Que baxe un poco los precios
piden tamién los güelguistes
y el pedilo ye de necios
siendo, como son, pufistes.

Si allí cansen de empinar
y lluego, con cara dura,
escapen en sin pagar
¿quieren mayor baratura?

El que armó la güelga esta
está algo mal del teyao
y nu está bien de la tiesta
quien se metió en tal fregao.

La güelga tóos esperamos
que dure menos d'un añu,
pos per aquí confiamos
que se rindan de secañu.

Teneis el santu d'espaldes
y ya veis lo que supone;
volvei pronto per "Les Caldes"
y que Baco vos perdone.

Comentarios

Publicar un comentario

Entradas populares de este blog

Los paxarinos

LOS PAXARINOS Arrefundiái los gomeros  y sei güenos, rapacinos;  dexai que llibres esnalen  p'el mundu los paxarinos.  ¿Decís que ye per arruelu?  Nun vengais con enguedeyos;  asentáivos 'n isi sucu  y arremellai bien los güeyos.  Mirai p'aquel xilguerín  cómo el picalín algama  d'aquilla argute guindal  blincando de rama en rama.  Picótia una roxa guinda,  cueye payes nel carreru,  paliquinos, yerba, folla...  y acárrialos pa'l so ñeru.  Ansina pásase'l díe  llasparderu, sin cansanciu,  y si apara ye pa dar  al eire so dolce canciu.  Lo mesmo fai la pioyina,  el ñerbatu, el raitanín,  la zarrica y el malvís,  la pega y el veranín.  Si allegramos los oyíos  ye la so xera del añu  ¿pa qué nun los protexeis  en vez de faceyos dañu...?  Arrefundiái los gomeros  y sei güenos, rapacinos;  dexai que llibres esnalen  p'el mundu los paxarinos.
Leer más

Una retirá a tiempu

UNA RETIRÁ A TIEMPU Tarazau per un dolor  que lu tien clavau na cama  pega quexíos y clama,  igual qu'n llocu, Melchor.  Lo que a él lu fai bufar  más que'l dolor, aquel día,  que paga la Compañía  y nun pué dir a cobrar.  Y si va la so Sunción  escuende la paga entera  nel fondu la faltriquera  y él nun güel un perrón.  Buscaba la solución  al casu, pa resolvelu,  cuando allegose pa velu  un compañeru: Xuanón.  —Llegaste nun bon momentu;  —diz Melchor con allegría—  Toma esto de seguía.  —y apurriói el Ilibramientu—.  Vas dir a cobrar per mí  callando de la muyer  y dempués d'escurecer  traes les perres p'aquí.  Acetó el amigu al puntu  y al marchar quedó Melchor  munchu meyor del dolor  al salvar aquel asuntu.  Asomó Xuanón con tientu  cuando hubo nochecíu,  pálidu, descoloríu como sopa en sin pimientu. Estaba l'home nerviosu;  apoyose nuna silla  y fincando la rodilla,  nel suelu, dixo miedosu:   —Perdóname, compañeru,  perdite la paga entera  en cá de la Moliner
Leer más

El carrerín

EL CARRERÍN Andia el carrerín  sin saber a ú va;  illi nun se apara  ni amira p'atrás.  Esguila a los montes,  abaxa a los valles,  estázase al río,  pero sigo alantre.  ¿A ú va el carrerín?  naide sabe ná;  ni a ú s'empobina  nin qué catará.  Iguen i los árbores  escolta d'honor  y peñeren'n illi  rayinos de sol.  Como el carrerín  yo tamién colé  sin saber a ú diba  ni en cata de qué.  Frayau d'andiar  per tóos los atayos  atopeme solu  al cabu los años.  Güey nun sé a qué vine  ni en cata de qué.  ¿U tá el carrerín  pa poer golver...?  Golver al llugar,  golver a la infancia,  al campu la ilesia  onde yo xugaba. Blincar a la muerte, xugar al pío campu, al saltu corríu al guá y liriu-lariu. Facer xiblatines, dir con utros neños a caza de grillos o en cata de ñeros. Pero toy muy llonxe, llonxe del ayer. ¿U tá el carrerín pa poer golver...?
Leer más